« ISTWA A LANNUIT BLÉ » - Alen P. Caprice

Messages: 854 · Golden Lyricist Inscrit le: 15 Nov 2001 Messages: 854 Localisation: An laboula!

Ki jan an ké fè pou mwen di’w
Tousa’w pa savé ?

Sizé’w la épi kouté
Mwen ké rakonté’w
Tchôk an blôk
Yonndé ti istwa a péyi-la
Mé sé vou menm ki pou konpwann
Sans a pawôl an mwen.

Mwen vwè
Blanchnèj ka dansé kadri
Evè an bannélo a sèt piti piti nèg nwè
Alantou on pyébwa sapen yo ay chèché lôtbô

Yo pôté lanèj
Adan konténè pli fwèt ki frijidè
Pou’y pa fonn
Pou fè timoun an nou
Glisé
Tonbé
Fann tèt a yo
Pèd la kat
Pèd mémwa
E pwan an finaldikont
Sa ki pa ta yo
Pou ta yo

Ansanm ansanm
Mwen ka japé èvè an band chyen an bôdé
Ki ka kouri
Pa la pè
Dèyè an bèf mèg kon sékan
A po é zo
Pou fè nou kwè sé konsa nou ké yé
Si lendépandans pwan lanmen

Mé
Sé lè’w vwè y ké ja two ta
Lè pièstéat-la ké ja fin
Lè lé aktè ké ja pati
Rido-la ké ja tonbé
Si ispèktatè ki pè palé two fô
Lè tout limyè ké ja étenn
Pou nwasè a lannuit blé enstalé

Pou’w oblyé
Pou ‘w ay dômi
San’w vwè ak
San’w tandé ak
San’w pa savé ak
San pozé kèksion
San palé
San rèspiré pou’w pa fè dyab lévé
Pou sonné tout kloch an tout chapèl ki ka goumé

Sé lè’w vwè
Y ké ja two ta
Lè mové aktè an sinéma lavi
Ké mèt konplé a nouvo-ansien-konbatan pou lendépandans
Pou yo rèkomansé travay
Menm jan
Menm koté yo té ja yé avan
Ka atann moun ki ka ékri Listwa
Evè papyé pwosévèbal pasé
Yo ké touvé
An fon a tribinal a fwansé

Sé lèw vwè
Mé y ké ja two ta
Moun profésè an gwan lékôl inivèsité
Péké tini ak pou transmèt
Nouvo jénérasyon a timoun an nou
Padavwa yo di
Yo ka ékri Listwa apré tan a Listwa fini

Mé kimoun ki té la
Lè’w vwè Dèlgrès té ka jwé violon an tèt a Matouba
Toupandan kannon, flanm èk difé té ka pété ?

Mi sékonsa yo ka ékri Listwa
Pou sôti an nwasè
Soufrans
Atann
Espérans a on pèp

Mé déparfwa
Vérité ka dépasé Listwa
Vérité ki ka touné viré kon fou
An tout tras é chimen
An senmityè a karo blan èk nwè
Pou touris ki pa konnèt ak
La’w vwè pôt a on kavo ka rifizé fèmé

On fanm blan a dimi fôl
Fèmé adan an bwèt an fè

Trayizon
A moun ki té ka tiré fisèl
An do a bwabwa politisyen
Ki pati san lésé pon an adrès

Foto a fidji a moun kolé si masonn a lanméri
An tout komin
Ka di moun dénonsé yo pou lajan
Kon adan on pyès korboy a siléma

Polis nèg
Two kontan yo té kontan yo té prèmyé douvan
Pou lakontantman a mèt blan a yo
Mé ki té osi soupwann
Lè yo vwè douvan yo
On vwazen
On kouzen
On zanmi
On ansyen ti fanm
On frè
Nou menm nou menm

On pwofésè blan fouté on zélèv an kout pyé
On boug sôti la’y sôti
Y fouté blan-la on kout sab si pyé ay
Yo mèt men si’y
Yo fou’y lajôl
Lilèt-la pri difé
E zéklè a solèy rikochté si lanm a sab-la
Pou pwan vi a nonm-la
Ki étenn kon flanm a bobèch yo souflé
San istwa

Wé ! Sa sé vérité !

Pandansitan
Nou la ka kontinyé fè ti nat an chivé a golwa
Nou la ka kriyé « Baré lé téroris »
Si sé la menm, timoun a esklav ki té fen libèté

Gwo pwopriétè a kann èk bannann
Mofwazé tè a yo
An « Kaz a ronm » pou touris
« Mizé a kako »
« Mizé a kafé »
« Mizé a kann »
« Mizé a bannann »
Evè bénédiksyon a konsèy jénéral ki ba yo sivansyon
Bank
Ki ba yo tout krédi yo té vlé
Pou wouvè Mylénis
Dèstrélan
Kdis
Lidèprays
Mè a komin
Ki ka touché lajan anba tab avan yo chanjé bô

E mwen menm
Konsidiré mwen vin gwan nèg
Mwen ka maché fal wouvè kon konkéran
Pou mwen alé konsomé adan an Prizinik

Dé zèl a papiyon
Ka pliyé anba pwa
A katsanmil aktè é komédien a lilèt-la
Ki pa ka di an sèl mo
Ki ka valé sèpan a Listwa oblijé
Kon zozyo gwangouzyé

Pon son paka sôti
An fon a tou a gôj an mwen

Pandansitan
Moun ki ka prévwa pou tan
Ka désidé, sis mwa avan
Konbyen siklôn ki pôkô vwè jou
Ké vin krazé péyi-la lanné lasa
Konsidiré yo té gadé adan boul kristal a on gadèdzafè

E yo jis ka prévwa :
« L’été sera chaud cette année ! »

Toupandan mwen té ka ékri pawôl lasa
On fanm
Ki bokanté non ay pou non a « Solitid »
Ka mô
Apré on maladi ki oblijé dôktè
Koupé tété ay
Tou sèl
Si on kouch lopital
Ka atann
Douvann pôt a Listwa
Pon moun vlé pa konnèt
Pon moun vlé pa tandé
Pon moun vlé pa ékri…
Pou’y janbé èk kaskôd.

Alen.P.CAPRICE
22 JUIN 2005

Li sé pawòl la an fwansé!